បន្ទាយមានជ័យ ៖ ជនសង្ស័យ ២នាក់ ម្នាក់ជនជាតិចិន ម្នាក់ទៀតជនជាតិខ្មែរ ដែលបានបាញ់សម្លាប់ជនជាតិចិន នៅចំណុចចំការដំឡូងមីមួយកន្លែងនៅក្រុងប៉ោយប៉ែត ត្រូវបានកម្លាំងមូលដ្ឋានកងរាជអាវុធហត្ថក្រុងប៉ោយប៉ែត ឃាត់ខ្លួនបានហេីយ និងដកហូតអាវុធខ្លី ២ដើម នៅយប់ថ្ងៃទី១៥ ខែមិថុនា ឆ្នាំ២០២៣។

លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានឱ្យដឹងថា ៖ ជនសង្ស័យ ២នាក់ត្រូវឃាត់ខ្លួន ១.ឈ្មោះ ZHOU YONG ហៅម៉ាទីន ភេទប្រុសអាយុ ៤៣ឆ្នាំ ជនជាតិចិន ២.ឈ្មោះ ឡោ លឹមហាប់ ភេទប្រុស អាយុ ៣២ឆ្នាំ ជនជាតិខ្មែរ ដែលស្នាក់បុរីសុខស្រេង ស្ថិតភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត។

លោកវរសេនីយ៍ត្រី នួន នីណារ៉ូ បន្តថា ៖ កាលពីវេលាម៉ោង៩និង៤០នាទីព្រឹកថ្ងៃទី១៥ ខែមិថុនា ឆ្នាំ២០២៣ នៅចំណុចចំការដំឡូងមី ស្ថិតភូមិព្រៃគប់ សង្កាត់អូរឫស្សី ក្រុងប៉ោយប៉ែត មានប្រជាពលរដ្ឋប្រទះឃើញសាកសពជនរងគ្រោះឈ្មោះ Shen Jianguo ភេទប្រុស អាយុ ៤២ឆ្នាំ ជនជាតិចិន ស្នាក់នៅបូរី សាន ស៊ានហូ ស្ថិតភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត។

បន្ទាប់មកប្រជាពលរដ្ឋបានរាយការណ៍ កម្លាំងមូលដ្ឋានកងរាជអាវុហត្ថ អាជ្ញាធរ រួមនិងសមត្ថកិច្ចជំនាញចុះទៅពិនិត្យរកឃើញសាកសពជាជនជាតិចិន មានពាក់អាវយឺត ពណ៌ខ្មៅ ខោយឺតជើងវែងពណ៌ស ទ្រនាប់ជើងប៉ាតា និងរកឃើញសំបកគ្រាប់អាវុធខ្លី ២គ្រាប់ ប្រភេទឡុក និងគ្រាប់ K54 ចំនួន ១គ្រាប់ មិនទាន់ផ្ទុះ និងមានស្នាក់ស្នាមត្រូវ ២កន្លែង ១កន្លែងចំក្បាល និង១កន្លែងទៀតចំស្មារខាងស្តាំ។

បន្ទាប់មកកម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកផ្ទាល់ បានធ្វើការស្រាវជ្រាវ រហូតកំណត់មុខសញ្ញាឈានឃាត់ខ្លួនជនសង្ស័យទាំង២នាក់ រួមនិងអាវុធខ្លី២ដើម ១ដើមអាវុធខ្លីប្រភេទGlouk.17 ចំនួន ១ដើម បង់១ មាន៥គ្រាប់ ២. និងមួយទៀតអាវុធខ្លីប្រភេទK54ចំនួន១ ដើមមានបង់ចំនួន ៧គ្រាប់ដែរ។

ក្រោយឃាត់ខ្លួនសង្ស័យ ២នាក់ ត្រូវបានកម្លាំងកងរាជអាវុធហត្ថកំពុងធ្វើការសាកសួរនិងអនុវត្តតាមនីតិវិធីបន្ត៕